粤语版古惑《隆中对》

　　师爷旧阵时成日落田丧耕，首饮歌系《梁父吟》。佢米八咁高，成日话自己管仲咁型、乐毅咁威，四围啲人都话佢丧嘅，系得博陵嘅崔仔，颍川嘅薯仔同佢系老死，赞佢够潮童。

　　当时阿公喺新野打趸。薯仔嚟投靠阿公，阿公好睇得起佢，薯仔就同阿公讲：“明仔系醒目仔嚟口架，你想唔想见下佢咩？”阿公话：“哦，噉你拉埋佢一齐入会啦。”薯仔话：“条友好宅口架，又臭寸，你都系自己去揾佢啦。”

　　于是乎阿公就亲自去刮明仔，前两次明仔都潜咗水，第三次先畀阿公拉正。阿公惊吓亲明仔，叫晒啲僆出去守住门口，同明仔讲：“自从阿爷瓜老衬之后，堂口就立立乱，董伯伯、曹爷都做过话事人，对阿爷嘅老婆仔女赶尽杀绝。我唔够把炮，虽然好想上位，但系又冇钱又冇面，搞成而家噉，我都滴晒汗。不过我面皮够厚，冇咁易认低威嘅，师爷，你话我点算好呢？”

　　明仔话：“自从董伯伯做低阿爷上咗位之后，好多粉肠都趁机霸住各个分堂口，就连啲阿猫阿狗都敢牙斩斩，系威系势，成个帮会七国咁乱。”

　　曹爷未上位之前，同袁少比，地盘同啲僆都差人几皮，不过佢最后都可以怼冧袁少，靠几条茂李打落个江山，唔单止系因为佢时运高，最紧要系因为佢够姜，识食脑。家阵曹爷有过百万条僆，又绑架咗大少，我地唔好立乱踩过界。

　　番鬼仔从佢伯爷到佢大佬再到佢，已经霸住江东三代，地盘够稳阵，下边啲人又support佢，而且啲僆打得又睇得，番鬼仔呢期咁掂，我地都千祈唔好同佢反面啊。

　　嗱，荆州四通八达，交通便利，又系核心CBD，绿化率高，个个堂主都睺住晒嘅。不过荆州个话事人刘表冇乜牙力，迟早拉柴，认真系阿爷开眼，咪走宝啊。至于益州虽然系新开发区，但系胜在地盘够大，想当年你阿爷个阿爷个阿爷都系靠呢度先做到揸fit人咋。刘璋条懵炳，份人十下十下，张鲁个契弟又成日睺住佢个地头，照我睇益州个地段咁好，配套咁完善，刘璋都唔识得珍惜。益州嗰边啲兄弟都想有条大水喉射住，阿公你系大少嘅叔父，又出嚟行咗咁多年，啲兄弟有边个敢唔畀面你，如果第时我哋可以收晒荆州、益州嘅场，再同西番莲啊、孟加拉国啊倾掂数，对外联合番鬼仔，对内执掂啲二五仔，等到曹爷嗰边有咩咿喐，就派条僆带荆州啲兄弟踩过宛、洛，你再亲自带班僆劈过去秦川，班契弟肯定自动自觉交晒啲陀地过你啦。如果行得通嘅话，到时称王称霸，个帮会就系我哋玩晒啦。”

　　阿公话：“掂！”从嗰时开始，两个麻甩佬就成日黐埋一齐，食又同煲，瞓又同铺。

　　阿公两个头马二爷同飞少都睇明仔劲唔顺眼，阿公就同佢哋讲：“自从明仔入咗会，就好似鱼有咗水，正所谓有着我便有着你，你哋咪再寸嘴啦！”于是两条友就唔敢再出声啦。